Vitse baş nazir – Ukrainanıñ vaqtınca işğal etilgen topraqlarınıñ reintegratsiya meseleleri naziri İrina Vereşçuk bunı haberdar etti.

Onıñ sözlerine köre, bugün Mariupol ve Berdânsktan Zaporijjağa gumanitar koridorlar vastasınen öz naqliyatınen ve tahliye avtobuslarınen 3686 kişi keldi. 1171-i Mariupoldan.

2515-i ise Poloğı, Vasılivka, Berdânsk, Melitopol ve Ğulâypole kibi Zaporijjâ vilâyetleriniñ şeerlerinden ketti.

Bugün Zaporijjâdan çıqqan Melitopol ve Tokmaknıñ sakinlerini tahliye etmek içün 11 avtobustan ibaret olğan sutun şu anda işğal ordusınıñ Vasılivkadaki blok noqtasında buluna. Yarın saba marşrut boyunca ketmege devam etecek.

Daa insanlarnı Berdânsktan tahliye etmek içün yarın saba Zaporijjâdan avtobuslar yollanacaq.

Bugün Lugansk vilâyetiniñ Lısıçansk, Severodontsk, Rubijne, Kreminna şeerlerinden ve Ğirske qasabasında 1206 kişi tahliye etildi.

«Er kün Mariupol şeerine kirmege tırışamız, amma işğal orduları ve rusiye federatsıyasındaki reberligi tüm ıntılmalarımıznı ve halqara teşkilâtlarnıñ ıntılmalarını bloklay»,- dep Vitse baş nazir qayd etti.

Onıñ sözlerine köre, Halqara Qırmızı Haç Eyyetiniñ delegatsiyası Mariupolğa kirmek ve insalnarnı tahliye etmek içün rus tarafınıñ ve Ukrainanıñ tüm kerekli kelişmelerine saip ola edi. Faqat olarğa yol bermegenden ğayrı, olar böyle degen DHCniñ gruppası tarafından tutulıp deyerli 24 saattır apiste buluna ediler.

«Amma buña baqmadan Mariupolğa kirmege tırışmağa devam etecekmiz»,- dep İrina Vereşçuk inandırdı.

Soñunda Vitse baş nazir bu şeerniñ sakinlerine, diger bloklanğan bölgelerde yaşağan ukrainalılarğa ve Hersonnıñ reberligi ve sakinlerine muracaat etti:

«Sayğılı mariupollılar! Qurtmañız içün yardım etmek içün elimizden kelgeni er şey yapacaqmız. Gumanitar yardımnı ketirmek ve insanlarnı tahliye etmek içün başqa bloklanğan cemaatlarğa koridorlar üzerinde çalışamız, – dep İrina Vereşçuk añlattı. – Hersonğa muracaat eterek bir qaç söz aytmağa isteyim. Siziñ içün zor olğanını bilem. Bazıda ümütsizlik mantıqlı tüşünmege mania olur. Boldurğan, raatlıq ve barışıqnı istegen vatandaşlar olğanını bilem. Amma tüm devlet bunı istey. Epimiz bunı isteymiz ve ınıtılamız. Vatandaşlarğa ve reberlerine muracaat etem: qazanacağımızğa inanıñız! Ükümetniñ meseleleriñizni bilgenini ve olarnı azaltmaq içün er şey yapqanını biliñiz. Bugün ya d atünevin gumanitar koridornı açmağa ve o qadar kerekli gumanitar yükni ketirmege becermese edik, bunıñ yarın olmaycağı manasına kelmey. Ğalebemizni beraber qazanayıq! » – dep Ukraina Vitse baş naziri çağırdı.